Istraktura ng mga Pamilya sa Pilipinas

Kapit-bisig

ni Angel Ann M. Abanto

                Isa. Indibidwal lamang tayo nang isilang sa mundo. Kaagapay ang pamilya natin na siyang umaruga at unang humubog sa pagkatao natin. Dalawa. Magsisimula tayong makakilala ng mga taong magiging kaagapay din natin. Kaibigan, kasintahan hanggang sa mauwi sa kasalan. Tatlo. Darating tayo sa punto na magsisimula ng sarili nating mga pamilya, kung saan walang kasiguraduhan kung ano ang magiging istraktura. Apat, lima, anim, pito maski humigit pa. Maaari ring huwag kang humiwalay kapag bumuo ng sariling pamilya, magsasama-sama ang lahat at magiging isang malaking pamilya.

                Bukod sa napakaraming uri ng pamilya, mayroong dalawa na pinakakilala. Ito ang nuclear, binubuo ng magulang at mga anak lamang at extended na uri kung saan maaaring kasama ninyo ang iyong mga lolo,lola,tita at tito. Ayon sa pag-aaral ng World Family Map noong 2015, ang nuclear na uri ng pamilya talaga ang mayroon sa buong Asya at Middle East. Sa pag-aaral naman ng Philippine Statistics Authority, may humigit kumulang 2.2 million na Overseas Filipino Workers (OFWs) sa iba't ibang parte ng mundo. Ibig sabihin ay ganoon din karami ang nasa ganoong uri ng pamilya.

                Ang aking ina isang OFW at kami rin ay isang extended na uri ng pamilya. Ayon sa aking nabasa mula sa www.Lorecentral.com, maraming positibong epekto sa kabataan ang isang extended na uri ng pamilya. Nasabi kong totoo ang mga ito noong nabasa ko kaya naman ilalathala ko rito ang kaalaman na nadiskubre ko. Ang mga nakapaloob daw sa isang extended na uri ng pamilya ay madalas na hindi nakararanas ng pakiramdam na mag-isa, mahusay makipagkapwa tao, matulungin at higit sa lahat, nakatitipid daw ang pamilyang ito dahil nakahiwa-hiwalay ang mga gastusin.  Sa kabilang banda, ang negatibong epekto naman nito ay maraming gastusin, maaaring wala masyadong kontrol sa mga bata at mapadalas ang mga pagkakaroon ng argumento.

"Masaya ang pamilya basta't sama-sama."

 

                Sa pagkakaroon naman ng OFW sa pamilya, naranasan ko ang magsulat ng liham upang makausap lamang ang aking ina. Sa pag-usbong ng makabagong teknolohiya, mas naging madali ang pagkikita namin lalo pa't nasa malayo siya. Hindi madali para sa lahat ang magkaroon ng ganitong uri ng pamilya at kailangan na malalakas ang loob na labanan ang lungkot na kaakibat ng pagkakawalay sa isa't isa.

"Masaya ang pamilya basta't may pagmamahal sa puso ng bawat isa."

                Maaari ring matalakay ang paglaganap ngayon ng mga tinatawag nating "Single mother o father" kung saan isa lamang ang magulang na umaalalay sa mga anak. Sa kasalukuyang panahon din ipinaglalaban na ang pagpasa sa "Divorce" kung saan mapapawalang bisa ang kasal ng mag-asawa. Hindi ito suportado ng simbahan ngunit suportado ng mga tao. Ang pinakadahilan nito, paano raw kung nagkakasakitan na ang mag-asawa at hindi lamang makahiwalay ang isa dahil nga sa kasal sila. Para naman sa mga hindi suporta, sagrado ang kasal at hindi kailanman dapat maghiwalay ang mga mag-asawa.

                Kung ako ang tatanungin, sang-ayon ako dahil ang payo ng mga nakatatanda sa akin ay kilalaning mabuti ang isang tao na napapalapit sayo ngunit kahit asawa mo na siya, hindi mo pa rin siya kilala nang lubos. Maaaring kapag sobrang nagalit pala siya ay masaktan ka ng pisikal at kapag nangyari ito ay nararapat lamang nga na kayo ay maghiwalay na at hindi na hintaying maulit pa ito muli.

                Pamilya ang lakas at kahinaan ng mga Pilipino. Handa nating gawin ang lahat para sa kanila. Ano mang uri ng pamilya mayroon ang isa tao, ito ay pamilya pa ring matatawag depende sa interpretasyon mo sa isang tunay na pamilya.